وفاقی ملازمین کے لیے 7 فیصد تنخواہ اضافہ، 15 فیصد ڈی آر اے، کنوینس الاؤنس میں 50 فیصد اضافہ اور دو ایڈہاک ریلیف الاؤنسز بنیادی تنخواہ میں ضم

اسلام آباد۔13جون (اے پی پی):حکومت نے مالی سال 2026-27 کے بجٹ میں 2022 کے 15 فیصد اور 2025 کے 10 فیصد ایڈہاک ریلیف الاؤنسز کو بنیادی تنخواہ میں ضم کرنے کی منظوری دے دی ہے۔ اس اقدام سے وفاقی ملازمین کی بنیادی تنخواہ میں مستقل اضافہ ہوگا، جس کے نتیجے میں مستقبل کی پنشن، سالانہ انکریمنٹس، ہاؤس رینٹ، کنوینس الاؤنس سمیت دیگر مالی مراعات میں بھی خاطر خواہ بہتری آئے گی۔ وفاقی سیکرٹری خزانہ امداد اللہ بوسال نے کہا ہے کہ مالی سال 2026-27 کے وفاقی بجٹ کے تحت سرکاری ملازمین کی تنخواہوں میں 7 فیصد اضافہ، 15 فیصد ڈسپیریٹی ریڈکشن الاؤنس (DRA)، کنوینس الاؤنس میں 50 فیصد اضافہ اور گزشتہ دو ایڈہاک ریلیف الاؤنسز کو بنیادی تنخواہ میں ضم کرنے کا فیصلہ کیا گیا ہے۔

ہفتہ کو بجٹ کے بعد تنخواہوں سے متعلق پیکیج کی وضاحت کرتے ہوئے انہوں نے بتایا کہ وفاقی ملازمین کو بنیادی تنخواہ پر 7 فیصد ایڈہاک ریلیف الاؤنس دیا جائے گا۔ اس کے علاوہ مختلف سرکاری ملازمین کے درمیان تنخواہوں کے فرق کو کم کرنے کے لیے 15 فیصد ڈسپیریٹی ریڈکشن الاؤنس بھی منظور کیا گیا ہے۔سیکرٹری خزانہ نے مزید کہا کہ بڑھتے ہوئے سفری اخراجات کے پیش نظر کنوینس الاؤنس میں 50 فیصد اضافہ کیا گیا ہے تاکہ ملازمین کو ریلیف فراہم کیا جا سکے۔یہ وضاحت انہوں نے پوسٹ بجٹ پریس کانفرنس کے بعد ’’اے پی پی ‘‘سے گفتگو کرتے ہوئے کی۔

پریس کانفرنس سے وفاقی وزیر خزانہ سینیٹر محمد اورنگزیب، وفاقی وزیر اطلاعات عطاء اللہ تارڑ ،وزیر مملکت برائے خزانہ بلال اظہر کیانی، وزارت خزانہ کے سینئر حکام اور ایف بی آر کے چیئرمین نے بھی خطاب کیا۔امداد اللہ بوسال نے مزید بتایا کہ حکومت نے دو سابقہ ایڈہاک ریلیف الاؤنسز کو بنیادی تنخواہ میں ضم کرنے کی منظوری دی ہے۔ ان میں 2022 میں دیا گیا 15 فیصد ایڈہاک ریلیف اور 2025 میں دیا گیا 10 فیصد ایڈہاک ریلیف شامل ہیں۔