وفاقی سرکاری ملازمین کا 75 فیصد سروس ریکارڈ ڈیجیٹلائز کر دیا گیا

اسلام آباد۔3اگست (اے پی پی):وفاقی حکومت نے انسانی وسائل کے انتظام کو جدید بنانے اور کاغذی ریکارڈ پر انحصار کم کرنے کے لیے چار آکوپیشنل گروپس سے تعلق رکھنے والے وفاقی سول سرونٹس کے تقریباً 75 فیصد سروس ریکارڈ کو ڈیجیٹلائز کر دیا ہے۔ویلتھ پاکستان کو دستیاب اور سینیٹ کی قائمہ کمیٹی برائے کابینہ سیکریٹریٹ میں پیش کی گئی سرکاری دستاویزات کے مطابق اسٹیبلشمنٹ ڈویژن نے ہیومن ریسورس مینجمنٹ انفارمیشن سسٹم (ایچ آر ایم آئی ایس) کے نفاذ کے ذریعے اس سلسلے میں نمایاں پیش رفت کی ہے۔دستاویزات کے مطابق ایچ آر ایم آئی ایس ایک مرکزی ڈیجیٹل پلیٹ فارم ہے، جس پر پاکستان ایڈمنسٹریٹو سروس (پی اے ایس)، پولیس سروس آف پاکستان (پی ایس پی)، آفس مینجمنٹ گروپ (او ایم جی) اور سیکریٹریٹ گروپ (ایس جی) سے تعلق رکھنے والے افسران کا سروس ریکارڈ محفوظ کیا جا رہا ہے۔

بریفنگ کے مطابق تقریباً 75 فیصد سروس ریکارڈ کا ڈیٹا پہلے ہی ایچ آر ایم آئی ایس میں شامل کیا جا چکا ہے، جبکہ باقی ریکارڈ کو ترجیحی بنیادوں پر ڈیجیٹلائز کیا جا رہا ہے۔دستاویزات میں بتایا گیا ہے کہ اسٹیبلشمنٹ ڈویژن ریکارڈ کی تصدیق، درستگی اور تکمیل کے لیے جامع جانچ کا عمل بھی جاری رکھے ہوئے ہے تاکہ نظام میں موجود تمام معلومات مستند، مکمل اور درست ہوں۔ڈیجیٹل پلیٹ فارم میں افسران کی ذاتی معلومات، تقرریاں، ترقیاں، سنیارٹی، تعلیمی قابلیت، تربیتی ریکارڈ، رخصت کی تفصیلات، پرفارمنس ایویلیوایشن رپورٹس (پی ای آرز) اور دیگر سروس سے متعلق معلومات شامل ہیں۔

افسران کو اپنے ریکارڈ کا جائزہ لینے اور ضروری تصحیح کے لیے درخواستیں جمع کرانے کی سہولت بھی فراہم کی گئی ہے، جنہیں تصدیق کے بعد نظام کا حصہ بنایا جاتا ہے۔اسٹیبلشمنٹ ڈویژن نے قائمہ کمیٹی کو بتایا کہ دستی ریکارڈ کی وجہ سے ڈیجیٹلائزیشن کے عمل میں کوئی تاخیر نہیں ہو رہی اور اس وقت توجہ باقی ماندہ ریکارڈ کی ڈیٹا انٹری اور تصدیق مکمل کرنے پر مرکوز ہے، تاکہ یہ نظام حکومت کے لیے انسانی وسائل کے انتظام کا مستند اور مرکزی ذریعہ بن سکے۔

دستاویزات کے مطابق مکمل طور پر فعال ہونے کے بعد ایچ آر ایم آئی ایس وفاقی سرکاری ملازمین کے سروس ریکارڈ کا واحد مرکزی ڈیجیٹل ذخیرہ ہوگا، جو ترقیوں، تبادلوں، تربیت اور انسانی وسائل سے متعلق دیگر امور میں معاونت فراہم کرے گا۔اس اقدام سے وفاقی حکومت میں انتظامی کارکردگی، شفافیت، ڈیٹا کی درستگی اور شواہد کی بنیاد پر فیصلہ سازی کو مزید بہتر بنانے میں مدد ملنے کی توقع ہے۔