جنوبی کوریا 2033 تک جدید ترین ماحولیاتی اور سمندری نگرانی کی سیٹلائٹ تیار کرے گا

سیئول۔25اگست (اے پی پی):جنوبی کوریا 2033 تک جدید ترین ماحولیاتی اور سمندری نگرانی کرنے والے سیٹلائٹ تیار کرے گا، جو موجودہ جیو سٹیشنری سیٹلائٹ کی جگہ لیں گے۔

اماراتی نیوز ایجنسی وام کے مطابق کوریا ایرو سپیس ایڈمنسٹریشن نے بتایا کہ Cheollian-6 سیٹلائٹ کی تیاری کی تجویز نے سرکاری فنڈ سے چلنے والے تحقیق و ترقی کے منصوبے کے لیے ابتدائی قابلِ عمل ہونے کا جائزہ کامیابی سے مکمل کر لیا ہے۔مجوزہ سیٹلائٹ کو 2033 میں لانچ کیا جائے گا اور اس منصوبے کے لیے تقریباً 770 ارب وون کا بجٹ مختص کیا گیا ہے۔ یہ سیٹلائٹ Cheollian-2B کے مشاہداتی فرائض سنبھالے گا، جسے 2020 میں خلا میں بھیجا گیا تھا۔Cheollian-6 کا بنیادی کام ماحول اور سمندروں کی نگرانی ہوگا، جس سے حکام فضائی اور سمندری آلودگی کے ساتھ ساتھ سمندری حادثات اور قدرتی آفات کا زیادہ تیزی سے پتا لگانے اور ان کی نگرانی کرنے کے قابل ہوں گے۔یہ جیو سٹیشنری سیٹلائٹ مقامی طور پر تیار کردہ ٹیکنالوجیز، بشمول ہائبرڈ پروپلشن سسٹم، استعمال کرتے ہوئے تیارکیا جائے گا۔ کوریا ایرو سپیس ایڈمنسٹریشن کے مطابق، اس میں ایسے آلات بھی نصب ہوں گے جو زمین کی نسبت ایک مقررہ مقام سے بیک وقت ماحولیاتی اور سمندری مشاہدات انجام دے سکیں گے۔