اوپن اے آئی نے مصنوعی ذہانت کا جدید ترین ماڈل GPT-6 Astra متعارف کرادیا

واشنگٹن۔4ستمبر (اے پی پی):اوپن اے آئی نے مصنوعی ذہانت کاجدید ترین ماڈل GPT-6 Astra متعارف کرادیا ہے۔

اماراتی نیوز ایجنسی وام کے مطابق اوپن اے آئی کا کہنا ہے کہ Astra کمپیوٹر اور براؤزر کے استعمال میں ایک نئی جہت کی نمائندگی کرتا ہے اور یہ کام غیر معمولی رفتار، درستگی اور تحفظ کے ساتھ انجام دیتا ہے۔کمپنی نے کہاکہ Astra ہمارا اب تک کا سب سے زیادہ ہم آہنگ (aligned) ماڈل ہے، جس میں صارف کی نیت کو سمجھنے اور ماڈل کے رویے میں نمایاں بہتری آئی ہے۔ اس کے فیصلوں پر زیادہ اعتماد کے ساتھ آپ اسے کام سونپ سکتے ہیں۔ اس کی جانچ کے لیے ہم نے ایک نیا جائزہ تیار کیا ہے جو Hugging Face کے واقعے سے حاصل ہونے والے تجربے کی بنیاد پر یہ جانچتا ہے کہ آیا کوئی ماڈل کسی مشکل یا ناممکن کام کا سامنا کرنے پر اپنی مقررہ حدود سے تجاوز کرتا ہے یا نہیں۔

GPT-5.6 Sol کے مقابلے میں، جس نے پیداواری حفاظتی اقدامات کے بغیر 48 فیصد مواقع پر مجاز ہدف سے تجاوز کیا، GPT-6 Astra نے ایسا صفر فیصد معاملات میں کیا۔یہ ماڈل اوپن اے آئی کے ان صارفین کے لیےفراہم کیا جا رہا ہے جو کمپنی کے سائبر سکیورٹی پروگرام Daybreak استعمال کرتے ہیں۔ آئندہ ایک ہفتے کے دوران یہ اوپن اے آئی کے بامعاوضہ پلانز، جن میں Pro، Plus، Enterprise اور Business اکاؤنٹس شامل ہیں، کے ساتھ ساتھ اس کی API کے ذریعے بھی دستیاب ہو جائے گا۔اوپن اے آئی کے صدر گریگ بروک مین نے کہا کہ Astra کمپنی کا ’’اب تک کا سب سے ذہین اور سب سے زیادہ ہم آہنگ ماڈل ہے۔انہوں نےکہا کہ یہ ماڈل ’’ہماری برسوں کی تحقیق اور بڑے فیصلوں کو یکجا کرتا ہے، جہاں ہر پیش رفت نے اگلی پیش رفت کی بنیاد رکھی‘‘ اور یہ ’’اس بات میں حقیقی تبدیلی کی نمائندگی کرتا ہے کہ لوگ کس نوعیت کے کام مصنوعی ذہانت کے سپرد کر سکتے ہیں اور یہ انہیں کس طرح بااختیار بنا سکتی ہے۔‘‘