وزیر مملکت و وزیراعظم کے معاون خصوصی برائے ڈیجیٹل میڈیا فہد ہارون کی صحافیوں سے ملاقات، ڈیجیٹل میڈیا کی صورتحال پر تبادلہ خیال

اسلام آباد۔10ستمبر (اے پی پی):وزیر مملکت و وزیراعظم کے معاون خصوصی برائے ڈیجیٹل میڈیا فہد ہارون نے ڈیجیٹل پلیٹ فارمز کے بڑھتے ہوئے کردار کو اجاگر کرتے ہوئے ذمہ دارانہ میڈیا طرز عمل، مستند معلومات اور تعمیری ڈیجیٹل بیانیے کی اہمیت پر زور دیاہے۔ جمعرات کو انہوں اپنے دفتر میں ٹیکنالوجی اور ڈیجیٹل میڈیا کا احاطہ کرنے والے صحافیوں سے ملاقات کی۔اس موقع پر ڈیجیٹل میڈیا کے بدلتے منظرنامے، ابھرتے ہوئے رجحانات، جعلی خبروں، غلط معلومات اور گمراہ کن معلومات سمیت شعبے کو درپیش چیلنجز اور مواقع پر تبادلہ خیال کیا گیا۔

فہد ہارون نے ڈیجیٹل پلیٹ فارمز کے بڑھتے ہوئے کردار کو اجاگر کرتے ہوئے ذمہ دارانہ میڈیا طرزِ عمل، مستند معلومات اور تعمیری ڈیجیٹل بیانیے کی اہمیت پر زور دیا۔انہوں نے پاکستان کی ڈیجیٹل تبدیلی کو معاشی ترقی، جدت اور روزگار کے لیے ایک اہم ذریعہ قرار دیتے ہوئے عالمی فری لانس معیشت میں پاکستان کی نمایاں پوزیشن کو بھی اجاگر کیا اور کہا کہ پاکستان دنیا کے سرفہرست فری لانس ممالک میں شامل ہےجو ملک کے ڈیجیٹل ہنر کی صلاحیت اور ٹیکنالوجی کے شعبے سمیت وسیع تر ڈیجیٹل معیشت میں اس کے کردار کی بھرپور عکاسی کر رہا ہے۔

فہد ہارون نے کہا کہ ڈیجیٹل پلیٹ فارمز عوامی رائے کی تشکیل میں اہم کردار ادا کر رہے ہیں، مستند معلومات اور تعمیری ڈیجیٹل بیانیے کو فروغ دینا ناگزیر ہے۔انہوں نے کہا کہ پاکستان کی ڈیجیٹل تبدیلی ملک کی معیشت کے لئے اہم مواقع پیدا کر رہی ہے،نوجوانوں کی بڑی تعداد اور ٹیکنالوجی سے وابستہ افرادی قوت اس شعبے کی ترقی میں کلیدی کردار ادا کر سکتی ہے۔شرکاء نے جعلی خبروں، غلط و گمراہ کن معلومات سمیت ڈیجیٹل میڈیا اور ڈیجیٹل صحافت کو درپیش مختلف چیلنجز پر بھی اپنے خیالات کا اظہار کیا۔ صحافیوں نے ڈیجیٹل صحافت کے مستقبل اور ڈیجیٹل پلیٹ فارمز پر ذمہ دارانہ میڈیا روابط کے فروغ کے حوالے سے اپنی آرا ء پیش کیں۔