آئی ایس پی آر نے یوم آزادی گلگت بلتستان کی مناسبت سے خوبصورت نغمہ ریلیز کر دیا

راولپنڈی۔1نومبر (اے پی پی):آئی ایس پی آر نےیوم آزادی گلگت بلتستان کی مناسبت سے خوبصورت نغمہ ریلیز کر دیاجس میں گلگت بلتستان کے نوجوان گلوکاروں کی آواز میں وطن سے محبت کا والہانہ اندازپیش کیا گیا ہے۔نغمہ کے بول ہیں "پاکستان کی شان – گلگت بلتستان”۔تفصیلات کے مطابق یہ نغمہ گلگت بلتستان کا وطنِ عزیزسے لازوال رشتہ اور محبت کی بہترین عکاسی کرتا ہے۔

یہ گیت اُن جانثاروں کی بھی یاد دلاتا ہے جنہوں نے مادرِ وطن کی حفاظت کے لیے اپنی جانوں کے نذرانے پیش کیے۔نغمہ میں اس امر کابھی ذکر کیا گیا ہے کہ جس نے بھی اس ملک کی جانب میلی نگاہ ڈالی اسکو ذلت ورسوائی کا سامنا کرنا پڑا۔نغمہ میں اس بات کی بھی ترویج کی گئی ہے کہ ہمیں اپنی تمام تر ذاتی رنجشوں کو بُھلا کر اس ملک کے مستقبل کوپیشِ نظر رکھنا چاہیے ۔ہم ایک عظیم قوم ہیں اور اس وطن کی سرفرازی کے لئے ہمیں اتحاد، محبت اور بھائی چارہ کی فضا کو قائم کرنا ہوگا.پاکستان ہمیشہ زندہ باد۔