آئی سی سی ٹی ٹونٹی ورلڈ کپ سپر 8 رائونڈ ،پاکستان اور نیوزی لینڈ کی ٹیمیں کل آمنے سامنے ہوں گی

کولمبو ۔20فروری (اے پی پی):آئی سی سی ٹی ٹونٹی ورلڈ کپ سپر 8 رائونڈ میں پاکستان اور نیوزی لینڈ کی ٹیمیں کل (ہفتے کو)سری لنکا کے دارالحکومت کولمبو کے آرپریما داسا سٹیڈیم میں نبرد آزما ہوں گی۔سری لنکا میں دیگر میچز کی طرح اس میچ میں بھی بارش کا خطرہ نمایاں ہے۔آئی سی سی کے قواعد کے مطابق، ٹی ٹونٹی عالمی کپ کے لیگ مرحلے اور سپر 8 کے میچز کے لیے کوئی ریزرو دن مقرر نہیں کیے گئے۔

اگر دونوں ٹیمیں میچ میں کم از کم پانچ اوورز کھیلنے میں کامیاب نہیں ہوتیں تو ہر ٹیم کو ایک ایک پوائنٹ بانٹنا ہوگا۔ اس سے پہلے نمیبیا اور آئرلینڈ کے درمیان میچ بارش کے باعث منسوخ ہو گیا تھا اور دونوں ٹیموں کو ایک ایک پوائنٹ دیا گیا تھا۔ہوا اور موسمی حالات کی پیش گوئی کے مطابق ہفتہ کو کولمبو میں تقریباً 80 سے 85 فیصد بارش کا امکان ہے جبکہ آٹھ فیصد کے قریب بجلی کی کڑک کے امکانات بھی ہیں۔ شہر میں مجموعی طور پر 6.7ملی میٹر بارش کی پیش گوئی کی گئی ہے، جس سے میچ کے انعقاد پر اثر پڑ سکتا ہے۔