آئی ٹی پی کااسلام آبادمیں یوم یکجہتی کشمیر کے موقع پر ٹریفک پلان

اسلام آباد۔5فروری (اے پی پی):اسلام آباد ٹریفک پولیس (آئی ٹی پی) نے جمعرات کو یوم یکجہتی کشمیر کے حوالے سے ٹریفک پلان جاری کیا ہے جس کا مقصد شہر میں ٹریفک کی روانی کو یقینی بنا نا ہے۔ آئی ٹی پی کے ایک اہلکار نے اے پی پی کو بتایا کہ دوپہر 2:30 بجے سے 3:30 بجے تک اسلام آباد ایکسپریس وے، مری روڈ اور کلب روڈ پر ٹریفک کا رخ موڑا جائے گا جس سے اسلام آباد ایکسپریس وے اور فیصل ایونیو پر ٹریفک کا دباؤ بڑھ سکتا ہے۔انہوں نے کہا کہ راولپنڈی سے اسلام آباد آنے والے مسافروں کو راول روڈ راولپنڈی، نائنتھ ایونیو، فقیر ایپی روڈ اور سری نگر ہائی وے استعمال کرنے کا مشورہ دیا جاتا ہے۔

انہوں نے مزید کہا کہ اسی طرح اسلام آباد سے راولپنڈی جانے والے روڈ یوزرز کو زیرو پوائنٹ اور سری نگر ہائی وے براستہ نائنتھ ایونیو استعمال کرنا چاہیے۔اہلکار نے مزید کہا کہ مری/بارہ کہو اور اسلام آباد کے درمیان سفر کرنے والے شہریوں کو کورنگ روڈ، بنی گالہ، پارک روڈ اور لہترار روڈ استعمال کرنے کا مشورہ دیا جاتا ہے جبکہ سرینا اور بارہ کہو سے راولپنڈی کی طرف جانے والوں کو کھنہ کے راستے پارک روڈ کا انتخاب کرنا چاہیے۔

انہوں نے کہا کہ آئی ٹی پی افسران شہریوں کی سہولت کے لیے سڑکوں پر تعینات رہیں گے اور مخصوص وقت کے دوران ٹریفک کو مؤثر طریقے سے منظم کریں گے۔اہلکار نے شہریوں کو مشورہ دیا کہ وہ ITP ہیلپ لائن 1915 یا ہنگامی ہیلپ لائن Pucar-15 کے ذریعے اپ ڈیٹ رہیں۔