بھارت ،پوجا کی تقریب کے دوران بھگدڑ مچنے سے 19 افراد ہلاک، 25 زخمی

کولکتہ۔18اکتوبر (اے پی پی):بی جے پی کے زیر اقتدار بھارتی ریاست مغربی بنگال میں ہندو پوجا کی ایک تقریب کے دوران لوگوں کے ہجوم میں اچانک اضافے کے باعث بھگدڑ مچنے سے کم از کم 19 افراد ہلاک اور 25 دیگر زخمی ہوگئے۔

کشمیر میڈیا سروس کے مطابق ہفتے کی شام شمالی کولکتہ میں ایک مقامی درگا پوجا کی تقریب کے دوران لوگوں کی بڑی تعداد جمع ہونے سے بھگدڑ جیسی صورتِ حال پیدا ہوئی جس میں کم از کم 19 افراد ہلاک اور 25 زخمی ہوگئے۔

پولیس کے ایک سینئر افسر نے ذرائع ابلاغ کو بتایا کہ بارش شروع ہوتے ہی چورباگان درگا پوجا پنڈال کے باہر انتظار کرنے والے ہجوم نے ایک ساتھ اندر جانے کی کوشش کی جہاں پہلے ہی بہت سے لوگ موجود تھے جبکہ کچھ باہر آرہے تھے۔ اس دوران بعض افراد سڑک پر گر گئے، جس کے نتیجے میں بھگدڑ جیسی صورتِ حال پیدا ہوگئی۔انہوں نے کہاکہ کم از کم 25 افراد کو تشویش ناک حالت میں کولکتہ میڈیکل کالج اینڈ ہسپتال منتقل کیا گیا۔