سرحد پار سے آنے والی دہشت گردی کو ریاست کی پوری طاقت سے کچل دیا جائے گا، مسلح افواج قوم کی مکمل حمایت سے پراکسی دہشت گردوں کے ٹھکانوں اور ان کے سہولت کاروں کا مکمل خاتمہ یقینی بنائیں گی، فیلڈ مارشل سید عاصم منیر

راولپنڈی۔8جولائی (اے پی پی):چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر نے اس عزم کا اعادہ کیاہے کہ سرحد پار سے آنے والی دہشت گردی کو ریاست کی پوری طاقت سے کچل دیا جائے گا۔مسلح افواج قوم کی مکمل حمایت سے ان پراکسی دہشت گردوں کے ٹھکانوں اور ان کے سہولت کاروں کا مکمل خاتمہ یقینی بنائیں گی۔

بدھ کو پاک فوج کے شعبہ تعلقات عامہ(آئی ایس پی آر )سے جاری بیان کے مطابق چیف آف آرمی سٹاف و چیف آف ڈیفنس فورسز فیلڈ مارشل سید عاصم منیرنےنیشنل ڈیفنس یونیورسٹی (این ڈی یو) اسلام آباد کا دورہ کیا جہاں انہوں نےنیشنل سکیورٹی اینڈ وار کورس کے فارغ التحصیل افسران سے خطاب کیا۔ اس کورس میں تینوں مسلح افواج کے افسران شریک تھے۔اپنے خطاب میں فیلڈ مارشل سید عاصم منیرنے جنگ کی بدلتی ہوئی نوعیت پر روشنی ڈالتے ہوئے کہا کہ پیچیدہ تذویراتی چیلنجز سے موثر انداز میں نمٹنے کے لیے واضح سٹریٹجک سوچ اور ادارہ جاتی پیشہ ورانہ مہارت بنیادی اہمیت رکھتی ہیں۔انہوں نے نیشنل ڈیفنس یونیورسٹی جیسے اعلیٰ تعلیمی اداروں کے کردار کو سراہتے ہوئے کہا کہ یہ ادارے مستقبل کی عسکری و سول قیادت کو ایسی صلاحیتوں سے آراستہ کر رہے ہیں جو ہائبرڈ، روایتی اور ذیلی روایتی خطرات کا بصیرت، اعتماد اور عزم کے ساتھ مقابلہ کر سکیں۔انہوں نے کہا کہ پاکستان کی مسلح افواج جنگ کی بدلتی ہوئی نوعیت کے مطابق اپنی حکمت عملی، صلاحیتوں اور آپریشنل طریقہ کار کو ازسر نو ترتیب دے رہی ہیں۔انہوں نے کہا کہ مسلح افواج ریاستی سرپرستی میں کام کرنے والی ان دشمن انٹیلی جنس ایجنسیوں کی پاکستان کو غیر مستحکم کرنے کی کوششوں سے مکمل طور پر آگاہ ہیں۔ ان دشمن ایجنسیوں کی سرپرستی میں کام کرنے والے نیٹ ورکس اور پراکسی عناصر کی تمام کوششیں ناکام ہوں گی اور انہیں پاکستان کے داخلی امن اور معاشی خوشحالی کو نقصان پہنچانے کی ہرگز اجازت نہیں دی جائے گی۔فیلڈ مارشل نے اس عزم کا اعادہ کیا کہ سرحد پار سے آنے والی دہشت گردی کو ریاست کی پوری طاقت سے کچل دیا جائے گا۔ انہوں نے کہا کہ مسلح افواج قوم کی مکمل حمایت سے ان پراکسی دہشت گردوں کے ٹھکانوں اور ان کے سہولت کاروں کا مکمل خاتمہ یقینی بنائیں گی۔انہوں نے کہا کہ جنگیں میڈیا کے شور و غوغا یا سیاسی نعروں سے نہیں بلکہ ایمان، اتحاد اور نظم و ضبط سے جیتی جاتی ہیں۔اپنے خطاب کے اختتام پر فیلڈ مارشل نے پاکستان کی جنگی تجربہ رکھنے والی مسلح افواج کی پیشہ ورانہ صلاحیت، بلند حوصلے اور مکمل آپریشنل تیاری پر بھرپور اعتماد کا اظہار کیا۔ انہوں نے فارغ التحصیل افسران پر زور دیا کہ وہ دیانت داری، بے لوث خدمت اور وطن سے غیر متزلزل وابستگی جیسی اعلیٰ اقدار کو ہمیشہ مقدم رکھیں۔نیشنل ڈیفنس یونیورسٹی پہنچنے پر فیلڈ مارشل سید عاصم منیرکا استقبال صدر نیشنل ڈیفنس یونیورسٹی نے کیا