وفاقی وزیر محمد جنید انوار چوہدری کا سری لنکا میں طوفان سے متاثرہ علاقوں کی بحالی کی کوششوں میں مدد کے لیے پاکستان کے عزم کا اعادہ

اسلام آباد۔9دسمبر (اے پی پی):وفاقی وزیر برائے بحری امور محمد جنید انوار چوہدری نے کولمبو، سری لنکا میں میڈیا بریفنگ کے دوران بگڑتے ہوئے موسمیاتی چیلنجز سے نمٹنے کے لیے علاقائی تعاون بڑھانے کی اشد ضرورت پر زور دیا۔ وزارت سے جاری پریس ریلیز کے مطابق وفاقی وزیر جو طوفان ڈتوا کے بعد پاکستان کی یکجہتی کا اظہار کرنے کے لیے دو روزہ دورے پر ہیں، نے سری لنکا کے متاثرہ علاقوں کی بحالی کی کوششوں میں مدد کے لیے اسلام آباد کے عزم کا اعادہ کیا۔

وزیر اعظم محمد شہباز شریف، حکومت اور پاکستانی عوام کی جانب سے جذبات کا اظہار کرتے ہوئے جنید انوار چوہدری نے طوفان سے ہونے والے نقصانات پر دلی تعزیت کا اظہار کیا۔ انہوں نے ریمارکس دیئے کہ ہم سری لنکا کی حکومت کی جانب سے کیے گئے فوری اقدامات اور متاثرہ کمیونٹیز کی جانب سے دکھائی جانے والی ہمت کی دل کی گہرائیوں سے تعریف کرتے ہیں۔جنید انوار چوہدری نے ہر ممکن انسانی اور تکنیکی مدد فراہم کرنے کے لیے پاکستان کے عزم کا اعادہ کیا۔ انہوں نے کہا کہ جیسا کہ پاکستانی ٹیمیں اور ریسکیو اہلکار زمین پر زندگیاں بچانے اور امدادی کارروائیوں میں مدد کر رہے ہیں۔

وفاقی وزیر نے کہا کہ وزیر اعظم کی ہدایات کے بعد سری لنکا کے لیے کافی انسانی امدادی پیکج پہلے ہی روانہ کر دیا گیا ہے۔ انہوں نے بتایا کہ کولمبو میں پاکستان کے ہائی کمشنر میجر جنرل فہیم العزیز نیشنل ڈیزاسٹر مینجمنٹ اتھارٹی کے ساتھ مل کر سری لنکا کے حکام کے ساتھ کام کر رہے ہیں تاکہ امدادی سامان کی بروقت ترسیل اور تقسیم کو یقینی بنایا جا سکے۔

پاکستان اور سری لنکا کے درمیان تاریخی طور پر مضبوط دوستی اور سمندری تعلقات کو اجاگر کرتے ہوئے جنید انوار چوہدری نے ڈیزاسٹر مینجمنٹ، میری ٹائم سیفٹی اور قبل از وقت وارننگ سسٹم میں تعاون کو مزید گہرا کرنے کی خواہش کا اظہار کیا۔انہوں نے سری لنکا کے عوام کے لیے دعا کرتے ہوئے کہا کہ پاکستان آج اور ہمیشہ ایک قابل اعتماد دوست اور شراکت دار کے طور پر سری لنکا کے ساتھ کھڑا ہے۔