چائنا انٹرنیشنل سپلائی چین ایکسپو میں مصنوعی ذہانت سب سے نمایاں موضوعات میں شامل

بیجنگ۔25جون (اے پی پی):چوتھی چائنا انٹرنیشنل سپلائی چین ایکسپو میں مصنوعی ذہانت سب سے نمایاں موضوعات میں شامل رہی اور نمائش کے مختلف حصوں میں انسان نما روبوٹس توجہ کا مرکز بنے رہے جبکہ چین اور دیگر ممالک کی معروف مصنوعی ذہانت کمپنیوں نے اپنی جدید ترین ٹیکنالوجیز اور اختراعی کامیابیاں پیش کیں۔

سی جی ٹی این کے مطابق اس سال پہلی مرتبہ ایکسپو میں مصنوعی ذہانت کے لیے ایک خصوصی نمائشی زون بھی قائم کیا گیا۔

جدید ٹیکنالوجی اور اختراع کے اس ماحول نے ملٹی نیشنل کمپنیوں کی دلچسپی میں مزید اضافہ کیا ہے اور آج یہ ایکسپو غیر ملکی کمپنیوں کے لیے چین کی اختراعی سپلائی چین کا حصہ بننے کا ایک اہم پلیٹ فارم بن چکی ہے۔

متعدد غیر ملکی کمپنیوں کے اعلیٰ عہدیداروں نے اپنے خیالات کا اظہار کرتے ہوئے کہا کہ چین کی سپلائی چین کی برتری اب صرف کم لاگت تک محدود نہیں رہی بلکہ یہ ایک ایسے جامع نظام میں تبدیل ہو چکی ہے، جس میں صنعتی اشتراک، اختراع کا مضبوط ماحولیاتی نظام اور طویل المدتی ترقی کا واضح وژن شامل ہے۔