اقوام متحدہ د۔2دسمبر (اے پی پی):اقوام متحدہ کے انڈر سیکرٹری جنرل برائے انسان دوست امور مارک لوکوک نےکہا ہے کہ کورونا وائرس کے باعث آئندہ سال دنیا بھر میں ریکارڈ 235 ملین افراد کوانسانی بنیادوں پر امداد اور تحفظ کی ضرورت ہو گی۔ جس میں رواں سال کی نسبت تقریبا 40 فیصد اضافہ ہو گا۔لوکوک نے کوویڈ -۱۹ کو اس تعداد میں اضافے کا بنیادی سبب قرار دیا۔ اقوام متحدہ کو وسیع پیمانے پر انسانی ضروریات کو پورا کرنے کے لئے آئندہ سال 35 بلین ڈالرز درکار ہوں گے۔ انہوں نے کہا کہ کورونا وائرس کی وبا نے تنازعات ، مہاجرت اور موسمیاتی تبدیلی کے اثرات سے دوچار کمزور گروہوں کو مزید مشکلات سے دوچار کر دیا ہے اس کے علاوہ متعدد ممالک میں قحط کا خطرہ بڑھتا جارہا ہے۔لوکوک نے اقوام متحدہ کی جاری کردہ رپورٹ عالمگیر انسان دوست صورتحال سروے 2021 کے حوالے سے کہا کہ یہ رپورٹ دنیا میں کمزور ترین اور غیر مستحکم ممالک کو وبا کے باعث پہنچنے والے شدید نقصانات کی عکاس ہے۔ انہوں نے کہا کہ 2021 میں دنیا کو درپیش انسان دوست چیلنجز غیر معمولی ہوں گے۔ 2021 میں ایک بڑے قحط سے بچنا نمایاں کامیابی تصور کی جائے گی۔
