اسلام آباد۔8اکتوبر (اے پی پی):پاکستان ملٹری اکیڈمی (پی ایم اے) کاکول، ایبٹ آباد میں پاسنگ آؤٹ پریڈ کا انعقاد کیا گیا۔ پاس آؤٹ ہونے والے کیڈٹس میں146 ویں پی ایم اے لانگ کورس، 34ویں ٹیکنیکل گریجویٹ کورس، 65ویں انٹیگریٹڈ کورس، 20ویں لیڈی کیڈٹ کورس اور 5ویں بیسک ملٹری ٹریننگ کورسز کے کیڈٹس کے علاوہ پاس آؤٹ کورسز میں فلسطین، مالدیپ، قطر، سری لنکا، نیپال اور عراق کے کیڈٹس بھی شامل تھے۔
چیف آف آرمی سٹاف (سی او اے ایس) جنرل قمر جاوید باجوہ نےپاسنگ آؤٹ پریڈ میں بطور مہمان خصوصی شرکت کی۔ پاک فوج کے شعبہ تعلقات عامہ (آئی ایس پی آر)کے مطابق چیف آف آرمی سٹاف نے پریڈ کا جائزہ لیا اور ممتاز کیڈٹس کو ایوارڈز سے نوازا۔ 146ویں پی ایم اے لانگ کورس کے اکیڈمی کے سینئر انڈر آفیسر محمد داؤد خان کو اعزازی تلوار سے نوازا گیا جبکہ 146ویں پی ایم اے لانگ کورس کے بٹالین کے سینئر انڈر آفیسر شعیب اکمل کو پریذیڈنٹ گولڈ میڈل، نیپال سے 146ویں پی ایم اے لانگ کورس کمپنی کے سینئر انڈر آفیسر جگت پوڈل کو چیئرمین جوائنٹ چیفس آف سٹاف کمیٹی اوورسیزگولڈ میڈل، چیف آف آرمی سٹاف اعزازی کین 34ویں ٹیکنیکل گریجویٹ کورس کے انڈر آفیسر مدثر امین اور 65ویں انٹیگریٹڈ کورس کے کورس انڈر آفیسر حیدر اعجاز، 20ویں لیڈی کیڈٹ کورس کی کورس انڈر آفیسر زنیرہ شفقت اور 5ویں ٹریننگ بیسک ملٹری کی کورس جونیئر انڈر آفیسر حرا عرفان کو کمانڈنٹ کین سے نوازا گیا۔
Short Link: https://urdu.app.com.pk/urdu/?p=331526
