لاہور۔13دسمبر (اے پی پی):نیوزی لینڈ میں میزبان ٹیم کو تین میچوں کی ٹی ٹوئنٹی سیریز میں دو ایک سے شکست دینے کے بعد پاکستان ویمنز ٹیم نے آئی سی سی ویمنز پلیئرز رینکنگ میں بھی نمایاں پیش رفت دکھائی ہے۔ٹی ٹوئنٹی سیریز میں پاکستان کی کامیابی میں کلیدی کردار ادا کرنے والی بائیں ہاتھ کی سپنر سعدیہ اقبال چوتھے نمبر پر آگئی ہیں۔سعدیہ نے 28 ٹی ٹوئنٹی کھیلے ہیں جن میں 29 وکٹیں حاصل کی ہیں، 2019 میں بنگلہ دیش کے خلاف 19 رنز کے عوض تین وکٹوں کے اس کے بہترین اعداد و شمار ہیں۔ان کی مسلسل کارکردگی کے لیے 28 سالہ سعدیہ کو نومبر کے لیے آئی سی سی ویمنز پلیئر آف دی منتھ کے لیے شارٹ لسٹ کیا گیا۔ون ڈے میں رینکنگ میں فی الحال 34 ویں نمبر پر ہیں۔
پاکستان کی ایک اور لیفٹ آرم سپنر نشرہ سندھو بھی آئی سی سی ویمنز ٹی ٹوئنٹی رینکنگ میں ٹاپ ٹین بائولرز میں شامل ہیں،نشرہ سندھو نے 51 ٹی ٹوئنٹی میں 53 وکٹیں حاصل کی ہیں ،وہ رینکنگ میں آٹھویں نمبر پر ہیں،ون ڈے میں وہ دو درجے ترقی کرکے 13 ویں نمبر پر آگئی ہیں۔ناصرہ اور سعدیہ کے علاوہ کپتان ندا ڈار آئی سی سی ویمنز ٹی ٹوئنٹی رینکنگ میں آل رائونڈرز میں پانچویں اور بائولنگ میں 18 ویں نمبر پر ہیں۔آئی سی سی ویمنز ون ڈے رینکنگ میں سدرہ امین نے ترقی دکھائی ہے۔
وہ اوول میں منگل کو سنچری کی وجہ سے تین درجے ترقی کر کے 21 ویں نمبر پر پہنچ گئی ہیں۔سدرہ آئی سی سی ویمنز چیمپئن شپ کے بیٹنگ چارٹس میں بھی سرفہرست ہیں۔انہوں نے 16 میچوں میں 65.53 کی اوسط سے 852 رنز بنائے ہیں جن میں تین سنچریاں اور چار نصف سنچریاں شامل ہیں۔سعدیہ اقبال کا کہنا تھا کہ کرکٹ چیلنجز اور سنگ میل کا کھیل ہے،عالمی ٹی ٹوئنٹی بائولنگ رینکنگ میں چوتھے نمبر پر پہنچنا میرے کیریئر کا ایک اہم حصہ ہے،چیئرمین پی سی بی مینجمنٹ کمیٹی ذکا اشرف کا کہنا تھا کہ خواتین کرکٹرز کی کارکردگی پر بے حد فخر ہے۔
گزشتہ دنوں انہوں نے نیوزی لینڈ کو انہی کے میدان میں شکست دے کر پہلی ایشیائی ٹیم ہونے کا اعزاز حاصل کیا ہے اور اب آئی سی سی کی درجہ بندی میں خواتین کرکٹرز کا بلند ہونا ان کی محنت اور عزم کی عکاسی کرتا ہے۔ہم پاکستان میں خواتین کی کرکٹ کی ترقی کے لیے پرعزم ہیں۔خواتین کی کرکٹ کی سربراہ تانیہ ملک کا کہنا تھا کہ رینکنگ میں ترقی کرنا ہماری کھلاڑیوں کے لیے ایک اہم سنگ میل ہے،جو ان کی مہارت، عزم اور پاکستان میں خواتین کی کرکٹ کی بڑھتی ہوئی مسابقت کو ظاہر کرنے کے ساتھ ساتھ ملک میں خواتین کرکٹ کو فروغ دینے اور ترقی دینے میں جو پیشرفت کر رہے ہیں اس کی نشاندہی کرتا ہے۔
Short Link: https://urdu.app.com.pk/urdu/?p=419695
