چیئرمین وزیراعظم یوتھ پروگرام رانا مشہود احمد خاں کا دورہ چین، پاکستان چین تعاون کومزید مضبوط بنانے کاعزم

بیجنگ ۔18جون (اے پی پی):چیئرمین وزیراعظم یوتھ پروگرام رانا مشہود احمد خاں نے بیجنگ میں اعلیٰ سطحی مصروفیات مکمل کیں جن کا مقصد پاکستان اور چین کے درمیان تعلیم، فنی تربیت، ٹیکنالوجی کی منتقلی، ڈیجیٹل جدت اور نوجوانوں کی ترقی کے شعبوں میں تعاون کو مزید مضبوط بنانا تھا۔جمعرات کو وزیراعظم یوتھ پروگرام سے جاری بیان کے مطابق دورے کی ایک اہم پیش رفت مختلف چینی اداروں کے ساتھ ہونے والی مفاہمتی یادداشتوں پر دستخط کی تقریب تھی، جسے رانا مشہود احمد خاں نے بذاتِ خود شرکت کی اور اس کی توثیق کی۔ یہ معاہدے وزیراعظم محمد شہباز شریف کے چین کے سرکاری دورے کے دوران طے پانے والی مفاہمتوں اور پاکستان چین سفارتی تعلقات کی 75 سالہ تقریبات کے تسلسل میں ایک اہم سنگِ میل ہیں۔یہ مفاہمتی یادداشتیں مشترکہ تربیتی اور تحقیقی مراکز کے قیام، ٹیکنالوجی کی منتقلی، نصاب کی تیاری، فنی و پیشہ ورانہ تعلیم، ہنر مندی کی تربیت، جدت پر مبنی نظام اور طلبہ کے تبادلہ پروگراموں کو وسعت دینے کی راہ ہموار کریں گی۔ یہ اقدامات دونوں ممالک کے اس مشترکہ عزم کی عکاسی کرتے ہیں کہ نوجوانوں کو علم، تحقیق اور مہارتوں کے نئے مواقع فراہم کیے جائیں۔دورے کے دوران رانا مشہود احمد خاں نے چائنا ایگریکلچرل یونیورسٹی، بیجنگ میں منعقدہ اعلیٰ سطحی سیمینار میں شرکت کی، جہاں چین کے معروف تعلیمی اداروں کے سربراہان بھی موجود تھے۔ اجلاس میں اعلیٰ تعلیم، زرعی علوم، فنی تربیت اور نوجوانوں کی ترقی میں تعاون کے نئے مواقع پر تفصیلی گفتگو ہوئی۔ شرکاء نے ممکنہ تعاون کے ماڈلز پیش کیے اور ٹیکنالوجی کی منتقلی، مشترکہ تحقیق اور طلبہ کے تبادلے جیسے امور پر تبادلہ خیال کیا۔انہوں نے بیجنگ یونیورسٹی آف ایگریکلچر کے کالج آف انجینئرنگ کا بھی دورہ کیا، جہاں انہیں پرتپاک استقبال کیا گیا۔ اس موقع پر پاکستان کے ساتھ مستقبل کے تعاون، فنی تعلیم، عملی تحقیق اور ہنر مندی کے فروغ پر تفصیلی بات چیت ہوئی۔ دونوں فریقین نے ادارہ جاتی روابط کو مضبوط بنانے کے عزم کا اظہار کیا۔ایک اور اہم ملاقات میں رانا مشہود احمد خاں نے علی بابا گروپ کی قیادت سے ملاقات کی، جس میں پاکستان چین معاہدوں کے تحت منصوبوں پر عملدرآمد پر گفتگو ہوئی۔ بات چیت میں پاکستانی نوجوانوں کو ای کامرس، ڈیجیٹل مہارتوں، کاروباری مواقع اور جدت کے ذریعے بااختیار بنانے پر زور دیا گیا۔انہوں نے بیجنگ میں منعقدہ ایک کانووکیشن تقریب میں بھی شرکت کی، جہاں پاکستانی طلبہ سے ملاقات کی اور ان کی کامیابیوں کو سراہا۔ انہوں نے طلبہ کو محنت، لگن اور حاصل کردہ علم کو پاکستان کی ترقی کے لیے استعمال کرنے کی تلقین کی۔ رانا مشہود احمد خاں نے کہا کہ پاکستان اور چین کا مشترکہ وژن تعلیم، جدت، ہنر اور نوجوانوں کی ترقی کے شعبوں میں تعاون کو مزید مضبوط بنانا ہے۔ انہوں نے کہا کہ نئے معاہدے مستقبل میں علم، تحقیق اور ترقی کے نئے دروازے کھولیں گے۔یہ دورہ پاکستان اور چین کی دیرینہ دوستی اور اسٹریٹجک شراکت داری کو مزید مضبوط بنانے میں ایک اہم قدم ہے۔