زرعی یونیورسٹی فیصل آباد میں انڈرگریجویٹ ڈگری پروگراموں میں داخلوں کیلئے انٹری ٹیسٹ کا انعقاد

فیصل آباد۔ 05 جولائی (اے پی پی):زرعی یونیورسٹی فیصل آباد میں انڈرگریجویٹ ڈگری پروگراموں میں داخلوں کے لیے پہلے انٹری ٹیسٹ کا انعقاد کیا گیا جس میں 12 ہزار 678 امیدواروں نے ملک بھر میں قائم 13 امتحانی مراکز میں شرکت کی۔ وائس چانسلر پروفیسر ڈاکٹر ذوالفقار علی کی ہدایت پر امیدواروں اور ان کے والدین کے لیے فول پروف انتظامات کیے گئے تھے تاکہ انہیں ہر ممکن سہولت فراہم کی جا سکے۔ ڈائریکٹر ایڈمیشن ڈاکٹر محمد مزمل جہانگیر کے مطابق انٹری ٹیسٹ کے لیے فیصل آباد، ٹوبہ ٹیک سنگھ، لاہور، گوجرانوالہ، لیہ، دیپالپور (اوکاڑہ)، نارووال، راولپنڈی، ملتان، رحیم یار خان، سرگودھا، بہاولپور اور بورے والا سمیت 13 شہروں میں امتحانی مراکز قائم کیے گئے تھے۔ وائس چانسلر پروفیسر ڈاکٹر ذوالفقار علی نے دیگر حکام کے ہمراہ فیصل آباد میں مختلف امتحانی مراکز کا دورہ کیا اور وہاں کیے گئے انتظامات کا جائزہ لیا۔ انہوں نے بتایا کہ جن امیدواروں نے پہلے انٹری ٹیسٹ کے لیے درخواست جمع نہیں کروائی انہیں دوسرے انٹری ٹیسٹ کے لیے رجسٹریشن کرانے کی ترغیب دی گئی ہے۔ دوسرے انٹری ٹیسٹ کے لیے آن لائن رجسٹریشن 8 جولائی سے 24 جولائی تک جاری رہے گی، جبکہ انٹری ٹیسٹ 2 اگست کو منعقد ہوگا۔ انٹری ٹیسٹ کے بعد امیدوار زرعی یونیورسٹی فیصل آباد کے مین کیمپس اور اس کے ذیلی کیمپسز میں اپنے مطلوبہ انڈرگریجویٹ ڈگری پروگراموں میں داخلے کے لیے درخواست دے سکیں گے۔ مزید معلومات کے لیے یونیورسٹی کی ویب سائٹ www.uaf.edu.pk ملاحظہ کریں۔ انہوں نے کہا کہ یہ امر قابل ذکر ہے کہ کیو ایس ورلڈ یونیورسٹی رینکنگ کے مطابق یونیورسٹی آف ایگریکلچر فیصل آباد کو ایگریکلچر اینڈ فارسٹری کے شعبے میں دنیا کی 33ویں بہترین جامعہ قرار دیا گیا ہے۔ یونیورسٹی نے تدریس، تحقیق اور اختراع کے میدان میں نمایاں کامیابیاں حاصل کی ہیں۔ برصغیر کے پہلے زرعی تعلیمی ادارے کی حیثیت سے زرعی یونیورسٹی نے زرعی ترقی، جدید تحقیق کے فروغ اور غذائی تحفظ کو یقینی بنانے میں ہمیشہ قائدانہ کردار ادا کیا ہے۔