فیلڈ ٹور کے زیر تربیت اہلکاروں کا دودی پتسر نیشنل پارک کا مطالعاتی دورہ، کنزرویشن ماحولیاتی نظام سے متعلق بریفنگ دی

ایبٹ آباد۔ 14 ستمبر (اے پی پی):90 ویں فارسٹ گارڈ (ایف جی) ریگولر کورس اور پانچویں وائلڈ لائف واچر ریگولر کورس کے فیلڈ ٹور کے چوتھے زیر تربیت اہلکاروں نے دودی پتسر نیشنل پارک کا دورہ کیا۔ ترجمان خیبر پختونخوا فارسٹ سکول تھائی ایبٹ آباد کے مطابق مانسہرہ وائلڈ لائف ڈویژن کے تحت دودی پتسر نیشنل پارک کے انچارج نے نیشنل پارک کے انتظام، تحفظ اور نگہداشت پر تکنیکی بریفنگ دی۔ اس میں پارک کی ماحولیاتی اہمیت، حیاتیاتی تنوع، محفوظ علاقہ کی حیثیت اور انتظامی مقاصد کا احاطہ کیا گیا۔ زیر تربیت اہلکاروں کو جنگلی حیات کے تحفظ، قدرتی مسکن (ہیبی ٹیٹ) کی حفاظت، حیاتیاتی تنوع کے انتظام اور ماحولیاتی سالمیت کو برقرار رکھنے کی اہمیت بارے آگاہ کیا گیا۔ واٹر شیڈ مینجمنٹ نے (آبی حوض کے انتظام) پر بھی تفصیلی سیشن منعقد کیا جس میں پانی کے بہاؤ کے توازن، مٹی کے تحفظ اور کٹاؤ کی روک تھام میں محفوظ جنگلات، الپائن نباتات، آبی علاقوں (ویٹ لینڈز)، ندی نالوں اور کیچمنٹ ایریاز (پانی جمع ہونے والے علاقوں) کے کردار کو اجاگر کیا گیا۔ بریفنگ میں گلیشیئرز کی نقل و حرکت، برفانی تودے گرنے (ایوا لانچ) اور پہاڑی علاقوں کے دیگر خطرات کے جنگلی حیات کے مسکن، نباتات، آبی گذرگاہوں اور انسانی آبادیوں پر اس کے اثرات کا بھی احاطہ کیا گیا جس میں موسمیاتی تغیر اور پہاڑی حالات میں تبدیلی پر خصوصی زور دیا گیا۔ زیرِ تربیت اہلکاروں کو ایکو ٹورازم (ماحولیاتی سیاحت) اور فطرت پر مبنی سیاحت، ماحولیاتی تعلیم، حیاتیاتی تنوع کے تحفظ اور پائیدار ذرائع معاش کیلئے اس کے امکانات سے بھی متعارف کرایا گیا۔ حساس پہاڑی ماحولیاتی نظام کی برداشت کی صلاحیت کے اندر رہتے ہوئے سیاحت کے انتظام کی اہمیت پر بھی زور دیا گیا۔ اس فیلڈ وزٹ نے محفوظ علاقہ کے انتظام، جنگلی حیات کے تحفظ، واٹرشیڈ کے تحفظ، پہاڑی خطرات سے آگاہی اور پائیدار ایکو ٹورازم کے حوالہ سے قیمتی عملی تجربہ فراہم کیا۔ طے شدہ سرگرمیوں کی تکمیل کے بعد زیرِ تربیت اہلکار رات کے قیام کیلئے ناران روانہ ہو گئے۔ فیلڈ ٹور کے پانچویں اور آخری روز زیر تربیت اہلکاروں نے ناران سے کے پی فارسٹ سکول تھائی، ایبٹ آباد واپسی کا سفر شروع کیا۔ واپسی کا یہ سفر 90 ویں فارسٹ گارڈ اور پانچویں ویں وائلڈ لائف واچر ریگولر کورسز کے طے شدہ فیلڈ ٹور کی کامیاب تکمیل کا مظہر تھا۔ اس ٹور میں تعلیمی، عملی اور فیلڈ پر مبنی سرگرمیوں کا ایک سلسلہ شامل تھا جس کا مقصد زیر تربیت اہلکاروں کی پیشہ ورانہ معلومات اور جنگلات، جنگلی حیات اور قدرتی وسائل کے انتظام بارے عملی فہم کو بڑھانا تھا۔