صدقہ فطر کم از کم 300 روپے فی کس مقرر

اسلام آباد۔22فروری (اے پی پی):رواں سال صدقہ فطر اور فدیہ کی کم از کم رقم 300 روپے فی کس مقرر کی گئی ہے، جس کے نرخ کھانے پینے کی اشیا کے زمرہ میں موجودہ مارکیٹ کی قیمتوں کے مطابق مقرر کیے گئے ہیں۔حکومت کی جانب سے سبسڈی والے آٹے کی بنیاد پر ادائیگی کرنے والوں کے لیے یہ رقم 200 روپے ہے جب کہ جو پر 1100 روپے، کھجور پر 1,600 روپے، کشمش پر 3,800 روپے اور خشک انگور (منقعہ) پر 5,400 روپے لاگو ہوتے ہیں۔30 قضا شدہ روزوں کا فدیہ گندم کی مد میں 9000 روپے، جو 33000 روپے، کھجور 48000 روپے، کشمش 114000 روپے اور خشک انگور کی قیمت میں 116200 روپے مقرر کیا گیا ہے۔

جو لوگ حکومت کی طرف سے سبسڈی والے آٹے کی بنیاد پر ادائیگی کرنے کا انتخاب کرتے ہیں ،ان کے لیے یہ رقم 6,000 روپے ہے۔اسلامی نظریاتی کونسل (سی آئی آئی) کے چیئرمین ڈاکٹر راغب حسین نعیمی نے اپنے ایک بیان میں کہا کہ مقررہ رقم کا تعین شرعی اصولوں کے مطابق کیا گیا ہے تاکہ مومنین کو عیدالفطر سے قبل اپنی ذمہ داریوں کو پورا کرنے میں آسانی ہو۔ انہوں نے جان بوجھ کر روزہ توڑنے کے کفارہ کی وضاحت کرتے ہوئے کہا کہ اس کے لیے یا تو لگاتار 60 روزے رکھنے ہوں گے یا 60 ضرورت مندوں کو دو وقت کا کھانا کھلانا ضروری ہے۔

انہوں نے نصاب کو وزن کے لحاظ سے بیان کرتے ہوئے کہا کہ گندم کے لیے یہ آدھا صاع (احتیاط کے طور پر تقریباً 2 کلو) ہے جب کہ جو، کھجور اور خشک انگور (منقعہ) کے لیے ایک صاع (احتیاط کے طور پر تقریباً 4 کلو) ہے۔سی آئی آئی کے سربراہ نے پنجاب سے باہر رہنے والے لوگوں کو مشورہ دیا کہ وہ اپنے اپنے صوبوں میں مروجہ قیمتوں کو مدنظر رکھتے ہوئے صدقہ فطر کی رقم کا حساب لگائیں۔انہوں نے اس بات پر زور دیا کہ صدقہ فطر ہر مسلمان پر فرض ہے۔ انہوں نے عید الفطر کے موقع پر ضرورت مندوں کی مدد میں اس کے کردار کو بھی اجاگر کیا۔