اسلام آباد ٹریفک پولیس کی 21 چوکیاں قائم ، 650 سے زیادہ لاپرواہ ڈرائیوروں کے خلاف کارروائی

اسلام آباد۔22مارچ (اے پی پی):اسلام آباد ٹریفک پولیس (آئی ٹی پی) نے عید کی تعطیلات کے دوران محفوظ اور ہموار ٹریفک کی روانی کو یقینی بنانے کے لیے شہر بھر میں 21 ٹریفک چیک پوائنٹس قائم کیے ہیں اور 650 سے زائد ون ویلرز اور لاپرواہ ڈرائیورز کے خلاف کارروائی کی ہے۔آئی ٹی پی کے حکام نے اتوار کو اے پی پی کو بتایا کہ ٹریفک پولیس شہریوں کی سہولت اور ٹریفک کا موثر انتظام کرنے کے لیے تمام عوامی مقامات پر موجود ہے۔

انہوں نے کہا کہ لیک ویو پارک، شکرپڑیاں اور دامن کوہ کو صرف فیملی پوائنٹس قرار دیا گیا ہے اور شہریوں کو مشورہ دیا جاتا ہے کہ فیملیز کے بغیر ان مقامات پر نہ جائیں۔انہوں نے نوجوانوں پر زور دیا کہ خطرناک اسٹنٹ جیسے کہ ون وہیلنگ اور لاپرواہی سے گاڑی چلانے سے گریز کریں۔ انہوں نے خبردار کیا کہ خلاف ورزی کرنے والوں کے خلاف سخت کارروائی جاری رہے گی۔انہوں نے اس بات کا اعادہ کیا کہ اسلام آباد ٹریفک پولیس ٹریفک کے موثر انتظام کو یقینی بنانے اور وفاقی دارالحکومت میں شہریوں کو زیادہ سے زیادہ سہولت فراہم کرنے کے لیے پرعزم ہے۔