خانیوال میں ریلوے گارڈز اور لوکو پائلٹس کے لیے جدید رننگ رومز کی اپ گریڈیشن مکمل

اسلام آباد۔17اگست (اے پی پی):وزیر ریلوے محمد حنیف عباسی کی جانب سے ریلوے گارڈز اور لوکو پائلٹس کے لیے ایک اور بڑے تحفے کا اعلان کر دیا گیا ہے۔ راولپنڈی کے بعد خانیوال میں بھی گارڈز اور لوکو پائلٹس کے لیے جدید سہولیات سے آراستہ ’رننگ رومز‘ کی کامیاب اپ گریڈیشن مکمل کر لی گئی ہے۔ترجمان ریلوے کے مطابق پاکستان ریلوے کی 79 سالہ تاریخ میں یہ پہلا موقع ہے جب رننگ رومز کی جدید خطوط پر اتنی جامع اپ گریڈیشن اور تزئین و آرائش کی گئی ہے۔ خانیوال میں تیار کیے گئے ان نئے رننگ رومز میں ریلوے کے فرنٹ لائن سٹاف کے لیے جدید، آرام دہ اور معیاری سہولیات فراہم کی گئی ہیں۔

وزارت ریلوے کی جانب سے جاری کردہ بیان میں کہا گیا ہے کہ وزیر ریلوے محمد حنیف عباسی کی خصوصی توجہ کے باعث محکمے کے فرنٹ لائن سٹاف کی سہولیات میں نمایاں بہتری لائی جا رہی ہے۔ ریلوے گارڈز اور لوکو پائلٹس کی فلاح و بہبود اور ان کے کام کرنے کے حالات کو بہتر بنانا موجودہ وزیر ریلوے کی اولین ترجیحات کا حصہ ہے۔خانیوال میں ان جدید رننگ رومز کی باضابطہ افتتاحی تقریب 22 اگست کو منعقد ہوگی۔اس شاندار پیش رفت پر وفاقی وزیر محمد حنیف عباسی نے اپنے اس عزم کا اعادہ کیا ہے کہ ریلوے کے محنتی ملازمین کو بہترین ماحول، جدید سہولیات اور باوقار ورکنگ کنڈیشنز کی فراہمی ہر صورت یقینی بنائی جائے گی تاکہ وہ پوری یکسوئی کے ساتھ اپنے فرائض سرانجام دے سکیں۔