سوئی خصوصی ترقیاتی پیکیج آخری مرحلے میں داخل، آٹھ میں سے چھ منصوبے مکمل

اسلام آباد۔26جولائی (اے پی پی):وفاقی حکومت پی ایس ڈی پی کے تحت جاری سوئی خصوصی ترقیاتی پیکیج کے آخری مرحلے میں داخل ہو گئی ہے، جہاں آٹھ میں سے چھ منصوبے مکمل ہو چکے ہیں، جبکہ دو سڑکوں کے منصوبوں پر کام جاری ہے۔

ویلتھ پاکستان کو دستیاب سرکاری دستاویزات کے مطابق مالی سال27 ۔ 2026 کے لیے اس منصوبے کے لیے 25 کروڑ 67 لاکھ 57 ہزار روپے مختص کرنے کی تجویز دی گئی ہے۔ پیکیج کی مجموعی منظور شدہ لاگت 4 ارب 69 کروڑ 80 لاکھ روپے ہے، جس میں سے 30 جون 2026 تک 3 ارب 85 کروڑ 20 لاکھ روپے جاری یا خرچ کیے جا چکے ہیں۔دستاویزات کے مطابق پیکیج کے تحت بجلی کی فراہمی سے متعلق تینوں منصوبے مکمل ہو چکے ہیں۔ ان منصوبوں کی مجموعی لاگت 1 ارب 83 کروڑ روپے ہے، جبکہ ان پر 1 ارب 62 کروڑ 50 لاکھ روپے جاری یا خرچ کیے جا چکے ہیں۔سڑکوں کے شعبے میں پانچ منصوبے شامل ہیں، جن کی مجموعی لاگت 2 ارب 86 کروڑ 80 لاکھ روپے ہے۔ ان میں سے تین منصوبے مکمل ہو چکے ہیں، جن کی مجموعی لاگت 1 ارب 22 کروڑ 90 لاکھ روپے ہے، جبکہ ان پر 1 ارب 15 کروڑ 10 لاکھ روپے جاری یا خرچ کیے جا چکے ہیں۔مکمل ہونے والے منصوبوں میں ڈولی چیک پوسٹ سے سگھاری روڈ، بشاپور لنک اور کوٹ جانی باری روڈ تک بلیک ٹاپ سڑک کی تعمیر، ڈیرہ بگٹی سے پیرکوہ، حبیب راہی، وڈیرا اور کلی مرید تک بلیک ٹاپ سڑک کی تعمیر، اور سوئی۔ڈیرہ بگٹی روڈ کی بہتری کے ساتھ ڈیرہ بگٹی میں بلیک ٹاپ لنک روڈ کی تعمیر شامل ہیں۔باقی دو سڑکوں کے منصوبوں پر اس وقت کام جاری ہے، جن کی مجموعی لاگت 1 ارب 63 کروڑ 90 لاکھ روپے ہے۔ دستاویزات کے مطابق 30 جون 2026 تک ان منصوبوں پر 1 ارب 8 کروڑ 20 لاکھ روپے جاری یا خرچ کیے جا چکے ہیں، جبکہ مالی سال27 ۔2026 کے لیے 25 کروڑ 67 لاکھ 57 ہزار روپے مختص کیے گئے ہیں۔جاری منصوبوں میں لہڑی سے سنگسلا روڈ تک بلیک ٹاپ سڑک (فیز-1) شامل ہے، جس کی لاگت 84 کروڑ 10 لاکھ روپے ہے۔ اس منصوبے پر 53 کروڑ 50 لاکھ روپے جاری یا خرچ کیے جا چکے ہیں، جبکہ مالی سال 27۔2026 کے لیے 15 کروڑ 60 لاکھ روپے مختص کئے گئے ہیں۔ دوسرا منصوبہ سوئی سے اُچ فیلڈ (57 کلومیٹر) تک بلیک ٹاپ سڑک کی تعمیر ہے، جس کی لاگت 79 کروڑ 77 لاکھ 10 ہزار روپے ہے۔ اس پر 54 کروڑ 69 لاکھ 53 ہزار روپے جاری یا خرچ کیے جا چکے ہیں، جبکہ رواں مالی سال کے لیے 10 کروڑ 7 لاکھ 57 ہزار روپے مختص کیے گئے ہیں۔دستاویزات کے مطابق مکمل ہونے والے بجلی کے منصوبوں میں سوئی میں 132 کے وی گرڈ اسٹیشن اور کشمور سے سوئی تک 132 کے وی ٹرانسمیشن لائن، ڈیرہ بگٹی میں 132 کے وی گرڈ اسٹیشن اور سوئی۔ ڈیرہ بگٹی 132 کے وی ٹرانسمیشن لائن، اور ڈیرہ بگٹی کے دیہات کی بجلی فراہمی کے منصوبے شامل ہیں۔دستاویزات کے مطابق سوئی خصوصی ترقیاتی پیکیج کے تحت ڈیرہ بگٹی ضلع میں سڑکوں اور بجلی کے بنیادی ڈھانچے کو بہتر بنانے پر توجہ دی گئی ہے۔ اب صرف دو سڑکوں کے منصوبے تکمیل کے مرحلے میں باقی رہ گئے ہیں، جنہیں مکمل کرنے کے لیے مالی سال 27۔2026 میں فنڈز مختص کیے گئے ہیں۔