صدر آصف علی زرداری نے کمانڈر نیشنل اسٹریٹجک کمانڈ جنرل سید عامر رضا کو نشانِ امتیاز (ملٹری) عطا کردیا

اسلام آباد۔11اگست (اے پی پی):صدرِ مملکت آصف علی زرداری نے منگل کے روز ایوانِ صدر میں منعقدہ خصوصی تقریبِ اعزاز میں کمانڈر نیشنل اسٹریٹجک کمانڈ جنرل سید عامر رضا(ہلالِ امتیاز (ملٹری)، ستارۂ بسالت )کو نشانِ امتیاز (ملٹری) عطا کیا۔یہ اعلیٰ ترین اعزاز پاکستان کے دفاع اور سلامتی کے لیے ان کی گراں قدر خدمات، غیر معمولی پیشہ ورانہ صلاحیتوں اور نمایاں خدمات کے اعتراف میں دیا گیا۔

ایوان صدر کے پریس ونگ سے جاری بیان کے مطابق تقریب میں وزیراعظم شہباز شریف، چیئرمین سینیٹ سید یوسف رضا گیلانی، نائب وزیراعظم و وزیر خارجہ اسحاق ڈار، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر( نشانِ امتیاز (ملٹری)، ہلالِ جرأت)،چیف آف نیول اسٹاف ایڈمرل نوید اشرف( نشانِ امتیاز، نشانِ امتیاز (ملٹری)، تمغۂ بسالت)، چیف آف ایئر اسٹاف ایئر چیف مارشل ظہیر احمد بابر سدھو( نشانِ امتیاز (ملٹری)، ہلالِ جرأت)، وفاقی کابینہ کے ارکان، ارکانِ پارلیمنٹ اور سفارتی برادری کے نمائندوں نے شرکت کی۔

بعد ازاں کمانڈر نیشنل اسٹریٹجک کمانڈ جنرل سید عامر رضا نے صدرِ مملکت سے ملاقات کی۔ صدر آصف علی زرداری نے انہیں مستقبل کی ذمہ داریوں کے لیے نیک خواہشات کا اظہار کیا۔