قائد ایوان سینیٹ سینیٹر راجہ محمد ظفرالحق کا سیمینار سے خطاب

اسلام آباد ۔ 10 اگست (اے پی پی) قائد ایوان سینیٹ سینیٹر راجہ محمد ظفرالحق نے کہا ہے کہ پاکستان چین کے ساتھ اپنے اشتراکی تعلقات کو خصوصی اہمیت دیتا ہے اور خاص طور پر پچھلے چند برسوں میں تجارت و سرمایہ کاری کو باہمی تعلقات میںنمایاں حیثیت رہی ہے، انہوں نے چین کی طرف سے پاکستان کو مختلف شعبوں جن میں بجلی، انفراسٹرکچر ،مینوفیکچرنگ اور انفارمیشن ٹیکنالوجی کے فروغ کےلئے فراہم کردہ تعاون کو سراہا۔ ان خیالات کا اظہار انہوں نے ادارہ برائے پالیسی سٹڈیز کے زیر اہتمام سیمینار سے خطاب کرتے ہوئے کیا۔ راجہ محمد ظفرالحق نے کہا کہ دونوں ممالک کے مشترکہ مفادات ہیں اور پاکستان چین کے ساتھ خصوصی برادرانہ تعلقات کے مزید فروغ کا خواہاں ہیں، پاک چین اقتصادی راہداری کا منصوبہ دونوں ممالک کی دوستی اور بھائی چارے کا منہ بولتا ثبوت ہے جس سے نہ صرف پاکستان کے عوام بلکہ ملک بھی خوشحالی کی طرف گامزن ہوگا۔انہوں نے سی پیک منصوبوں سے زیادہ سے زیادہ فائدہ اٹھانے پر زور دیتے ہوئے کہا کہ سی پیک منصوبہ دونوں ممالک کے مابین صرف تجارتی راستہ ہی نہیں بلکہ اسے خصوصی اہمیت حاصل ہے، اقتصادی راہداری کے منصوبوں کے ثمرات پاکستان کو ملنا شروع ہو گئے ہیں اور پاکستان میں بجلی کی کمی پر قابو پایا جا رہا ہے،اقتصادی راہداری کے منصوبے سے پاکستان کے پسماندہ علاقوںکو بڑے شہروں سے ملا کر پسماندگی دور کرنے میں خاصی مد د ملے گی۔