اسلام آباد۔20فروری (اے پی پی):اسلام آباد پیس اینڈ کلچر آرگنائزیشن کی چیئرپرسن اور حریت رہنما یاسین ملک کی اہلیہ مشعال حسین ملک نےبھارت کے غیر قانونی زیر قبضہ جموں و کشمیر کے حوالے سے خاموشی اختیار کرنے کے رو یہ پر بین الاقوامی برادری اور اقوام متحدہ کو تنقید کا نشانہ بناتے ہوئے کہا ہے کہ عالمی برادری کشمیریوں کی دل دہلا دینے والی فریادیں بھی نہیں سن سکتی،کشمیری بیٹیاں برسوں سے بھارتی جیلوں میں غیر قانونی طور پر نظر بند اپنے والد کی رہائی کا مطالبہ کر رہی ہیں۔
سینئر حریت رہنما یاسین ملک کی اہلیہ مشعال ملک نے پیر کو ایک بیان میں کہا کہ ضلع بارہمولہ کے کئی خاندانوں نے اپنے بچوں کے ساتھ سرینگر کی پریس کالونی میں کئی سالوں سے کئی جیلوں میں بند اپنے رشتہ داروں کے مقدمات کی سماعت میں تاخیر کے خلاف احتجاج کیا۔ انہوں نے کہا کہ معصوم بیٹیاں پرنم آنکھوں کے ساتھ قید کشمیری والد کی فوری بنیادوں پر رہائی کا مطالبہ کر رہی ہیں کیونکہ وہ فاشسٹ بھارتی حکومت کی طرف سے ان کے ساتھ روا رکھے جانے والے وحشیانہ سلوک سے بخوبی واقف ہیں۔
حریت رہنما نے کہا کہ بھارتی بدنام زمانہ حکومت ڈھٹائی سے کشمیریوں کے بنیادی حقوق کی خلاف ورزی کر رہی ہے اور بھارت کے غیر قانونی زیر قبضہ جموں و کشمیر میں ریاستی دہشت گردی کو ہوا دے رہی ہے لیکن نام نہاد مہذب دنیا نے انسانی حقوق کی ان بدترین خلاف ورزیوں پر اپنے ہونٹ سی لیے ہیں۔مشعال ملک نے بتایا کہ ایک چھوٹی بچی جس نے اپنے والد کو گزشتہ پانچ سال سے نہیں دیکھا، اپنے جیل میں بند والد سے ملنے کے لیے رو رہی تھی۔چیئرپرسن پیس اینڈ کلچر آرگنائزیشن نے عالمی طاقتوں اور انسانی حقوق کی تنظیموں پر زور دیا کہ وہ ان معصوم روحوں کی فریاد سنیں جو سیاسی طور پر جعلی مقدمات میں بھارتی جیلوں میں قید اپنے باپ دادا کی رہائی چاہتی ہیں۔
انہوں نے کہا کہ دیگر کشمیری بیٹیوں کی طرح رضیہ سلطانہ نے بھی تقریباً 9 سال سے اپنے والد کو نہیں دیکھا جنہوں نے کئی بار اقوام متحدہ کے اداروں سے اپنے والد کی رہائی اور ان سے ملاقات کو یقینی بنانے کا مطالبہ کیا لیکن نہ دنیا اور نہ ہی بدنام زمانہ مودی سرکار نے ان کی طرف کوئی توجہ دی۔ مشعال ملک نے عالمی برادری اور اقوام متحدہ کے اداروں پر زور دیا کہ وہ ان کے شوہر سمیت کشمیری سیاسی قیدیوں کی فوری رہائی کو یقینی بنائیں کیونکہ ان سب کو کسی جرم کے لیے نہیں بلکہ صرف کشمیر کی جدوجہد آزادی کے شعلوں کو بجھانے کے لیے جیلوں میں ڈالا گیا تھا۔انہوں نے کہا کہ کشمیر کا تنازعہ ایک بین الاقوامی تنازعہ ہے نہ کہ بھارت کا اندرونی معاملہ جسے اقوام متحدہ کی قراردادوں نے تسلیم کیا ہے، اس لیے اسے اس کے تاریخی تناظر میں حل کیا جانا چاہیے۔
حریت رہنما نے کہا کہ دی گارڈین نے بھارت کے غیر قانونی زیرقبضہ جموں و کشمیر پر بوچر پیپرز جاری نہ کرنے پر بھارت کے مکروہ چہرے کو بھی بے نقاب کیا جن میں جنرل رائے بوچر نے نہرو کو کشمیر کا مسئلہ اقوام متحدہ میں پرامن حل کے لیے لے جانے کا مشورہ دیا لیکن وقت آنے پر الحاق پر قبضہ کر لیا گیا تھا۔یہاں یہ بات قابل ذکر ہے کہ کشمیر پر بوچر پیپرز میں جواہر لعل نہرو اور جنرل رائے بوچر کے درمیان کشمیر اور جنگ بندی پر خط و کتابت موجود تھی۔ انہوں نے کہا کہ کشمیریوں سے کئے گئے آزاد ریاست کے وعدے کی خلاف ورزی کی گئی اور اب فاشسٹ مودی سرکار نے کشمیریوں سے کئے گئے وعدے کی خلاف ورزی کو منظر عام پر آنے سے روکنے کی کوشش کی۔
مشعال ملک نےکہا کہ 1952 میں نہرو نے بھارتی لوک سبھا میں بیان دیا کہ کشمیری اپنے مستقبل کا فیصلہ کرنے میں آزاد ہیں اور بھارت بندوق کی نوک پر کشمیریوں پر اپنی مرضی مسلط نہیں کرے گا تاہم انہوں نے کہا کہ بھارتی بدنام زمانہ حکومت نے بوچر پیپرز کو اس کے بھارت پر ممکنہ سیاسی اور بیرونی مضمرات کے پیش نظر پبلک نہیں کیا۔ انہوں نے اس رپورٹ کو پبلک کرنے کا مطالبہ کیا تاکہ دنیا کو تنازعہ کشمیر کی حقیقت کا علم ہو۔ چیئرپرسن نے عالمی طاقتوں پر زور دیا کہ وہ مسئلہ کشمیر کے حل کے لیے اقوام متحدہ کی قراردادوں پر عمل درآمد کو یقینی بنائیں۔
Short Link: https://urdu.app.com.pk/urdu/?p=352306
