اسلام آباد۔15مئی (اے پی پی):وزیر اعظم محمد شہباز شریف نےآذربائیجان کی طرف سے پاکستان کے ساتھ بھرپور یکجہتی اور حمایت کے اظہار پر صدر الہام علیوف کا شکریہ ادا کرتے ہوئے کہا ہے کہ پاکستان اور آذربائیجان ہمیشہ سچے بھائیوں کی طرح ایک دوسرے کے ساتھ کھڑے رہے ہیں۔جمعرات کو وزیراعظم آفس کے میڈیا ونگ کی طرف سے جاری بیان کے مطابق وزیراعظم محمد شہبازشریف نے جمہوریہ آذربائیجان کے صدر الہام علیوف کو ٹیلی فون کیا اور جنوبی ایشیا کے حالیہ بحران میں آذربائیجان کی طرف سے بھرپور یکجہتی اور حمایت پر صدر الہام علیوف کاشکریہ ادا کیا۔
انہوں نے کہا کہ صدر الہام علیوف کی مستقل حمایت پاکستانی عوام سے ان کی بے پناہ محبت اور پیار کا ایک اور مظہر ہے۔ وزیراعظم نے پاکستان کے ساتھ اظہار یکجہتی پر آذربائیجان کے برادر عوام کا بھی شکریہ ادا کیا۔ انہوں نےکہا کہ ایک بار پھر دونوں ممالک کے مابین پائیدار اور دیرینہ دوستی کا اظہار ہوا ہے ، پاکستان اور آذربائیجان کے عوام ہمیشہ سچے بھائیوں کی طرح ایک دوسرے کے ساتھ کھڑے رہے ہیں۔ وزیراعظم نے اس بات پر زور دیا کہ پاکستان نے علاقائی امن کیلئے بھارت کے ساتھ جنگ بندی مفاہمت پر اتفاق کیا ہے اور اسے برقرار رکھنے کے لئے پرعزم ہے۔
وزیر اعظم محمد شہباز شریف نے بھارتی قیادت کے حالیہ اشتعال انگیز بیانات پر اپنی تشویش کا اظہارکرتے ہوئے اس بات کا اعادہ کیا کہ مستقبل میں کسی بھی جارحیت کا سامنا کرنے کے لئے پاکستان اپنی خودمختاری اور علاقائی سالمیت کا بھرپور دفاع کرے گا۔ وزیرِ اعظم نے زور دے کر کہا کہ جموں و کشمیر کا تنازعہ جنوبی ایشیا میں عدم استحکام کی بنیاد ہے جسے اقوام متحدہ کی سلامتی کونسل کی قراردادوں کے مطابق حل کیا جانا چاہیے۔
وزیر اعظم محمد شہباز شریف نے کشمیر کاز کے لئے پاکستان کی اصولی حمایت پر صدر علیوف کا شکریہ ادا کیا۔ وزیر اعظم نے پاکستان آذربائیجان کے درمیان خصوصی اور وقت کی آزمائش پر پورا اترنے والے برادرانہ تعلقات پر روشنی ڈالتے ہوئے کہا کہ پاکستان اس دوستی کو باہمی طور پر فائدہ مند اقتصادی شراکت داری میں بدلنے کے لئے پوری طرح پرعزم ہے۔
انہوں نے پاکستان کے مختلف شعبوں میں آذربائیجان کی طرف سے 2 ارب ڈالر کی سرمایہ کاری سے متعلق تجاویز کو حتمی شکل دینے کے لئے ہونے والی پیش رفت پر اطمینان کا اظہار کیا۔ انہوں نے صدرالہام علیوف کو جلد پاکستان کا سرکاری دورہ کرنے کی دعوت کی تجدید بھی کی جو صدرالہام علیوف نے قبول کر لی۔ صدر علیوف نے پاکستان کی شاندار کامیابی پر وزیراعظم کو مبارکباد دی۔
انہوں نے امن کے لئے پاکستان کی کوششوں کو سراہتے ہوئے جنگ بندی مفاہمت کا خیرمقدم کیا۔ انہوں نے اس بات کا اعادہ کیا کہ آذربائیجان پاکستان کے ساتھ تمام شعبوں میں اپنے برادرانہ تعلقات کو مضبوط بنانے کے لئے پرعزم ہے۔
Short Link: https://urdu.app.com.pk/urdu/?p=597310
