نماز اور اذان کے لیے متفقہ کلینڈر جلد جاری کیا جائے گا،حکومت بین المذاہب ہم آہنگی اور اقلیتوں کے تحفظ کے لیے پرعزم ہے، سردار محمد یوسف

اسلام آباد۔26فروری (اے پی پی):وفاقی وزیر برائے مذہبی امور و بین المذاہب ہم آہنگی سردار محمد یوسف نے کہا ہے کہ وزارت مذہبی ہم آہنگی کے فروغ کے لیے تمام مکاتب فکر کی نمائندگی کرنے والے نامور سکالرز، علما اور تاجر برادری کے اراکین کی مشاورت سے ایک متفقہ کیلنڈر تشکیل دے رہی ہے تاکہ اذان اور نماز کے اوقات کو معیاری بنایا جا سکے۔ وفاقی وزیر نے کہا کہ مجوزہ کیلنڈر فی الحال متعلقہ نظام صلوٰۃ کمیٹی کے زیر جائزہ ہے اور توقع ہے کہ اسے حتمی شکل دے کر جلد شائع کر دیا جائے گا۔انہوں نے کاروباری برادری بالخصوص آئی سی سی آئی کی طرف سے وزارت کے ساتھ مسلسل تعاون کو سراہتے ہوئے اس اقدام کو کامیابی سے نافذ کرنے میں آئی سی سی آئی کی قیادت سے مکمل تعاون بھی طلب کیا۔ان خیالات کا اظہار انہوں نے جمعرات کو اسلام آباد چیمبر آف کامرس اینڈ انڈسٹری (آئی سی سی آئی) میں ایک انٹرایکٹو سیشن سے خطاب کرتے ہوئے کیا۔معاشی سرگرمیوں میں اسلامی اصولوں پر زور دیتے ہوئے سردار محمد یوسف نے زور دیا کہ تجارت اور کاروبار اسلامی تعلیمات کے مطابق کیا جائے جس سے دنیا اور آخرت دونوں میں کامیابی یقینی ہو۔ بین المذاہب ہم آہنگی کی اہمیت کو اجاگر کرتے ہوئے انہوں نے رواداری اور اتحاد کو فروغ دینے کے لیے اپنی وزارت کے ملک گیر اقدامات کو اجاگر کیا۔

انہوں نے اس بات کا اعادہ کیا کہ اقلیتوں کے جان و مال کا تحفظ حکومت کی آئینی ذمہ داری ہے۔ انہوں نے مزید کہا کہ باہمی افہام و تفہیم اور پرامن بقائے باہمی کو مضبوط بنانے کے لیے باقاعدہ بین المذاہب کانفرنسوں کا انعقاد کیا جا رہا ہے۔قبل ازیں اپنے خطبہ استقبالیہ میں آئی سی سی آئی کے صدر سردار طاہر محمود نے بین المذاہب ہم آہنگی کو فروغ دینے اور عازمین حج کے لیے سستی سہولتوں کو یقینی بنانے کے لیے ان کی انتھک کوششوں پر وفاقی وزیر کا شکریہ ادا کیا۔سردار طاہر محمود نے یقین دلایا کہ پوری تاجر برادری اتحاد و استحکام کے فروغ میں حکومت کے ساتھ کندھے سے کندھا ملا کر کھڑی ہے۔ انہوں نے پاکستان کے دشمنوں کی طرف سے کی جانے والی دہشت گردی کی کارروائیوں کی شدید مذمت کی اور چیمبر کے پلیٹ فارم سے نوجوانوں کو انتہا پسندانہ بیانیہ کے خلاف آگاہی سیشن منعقد کرنے کی پیشکش کی۔سینئر نائب صدر طاہر ایوب نے مہمان خصوصی کو بتایا کہ آئی سی سی آئی کے 15,000 سے زائد رجسٹرڈ ممبران ہیں اور وہ اپنی کاروباری سرگرمیوں کے ساتھ ساتھ اپنی کارپوریٹ سماجی ذمہ داری کو بھی بھرپور طریقے سے سرانجام دے رہا ہے۔

مولانا احمد علی نے چیمبر کی سیرت کلاسز اور مستقبل کے اقدامات پر روشنی ڈالی جبکہ نائب صدر عرفان چوہدری نے اپنے اظہار تشکر میں، مذہبی تعلیمات اور سماجی ہم آہنگی کے حوالے سے کمیونٹی میں بیداری پیدا کرنے کے لیے آئی سی سی آئی کے عزم کا اعادہ کیا۔تقریب میں سابق صدر ظفر بختاوری، ایگزیکٹو ممبران ملک عبدالعزیز، ذوالقرنین عباسی، عمران منہاس، آفتاب گجر، مرزا محمد علی، سابق سینئر نائب صدر ملک نوید، خالد چوہدری، محمود وڑائچ، چیئرمین مذہبی امور کمیٹی طارق وانی اور تاجر برادری کے دیگر افراد نے بھی شرکت کی۔