پی سی بی،پاکستان سپر لیگ کے مقابلوں کیلئے پیپسی کو سرکاری مشروب اور تفریحی شراکت دار مقرر کرنے کا اعلان

لاہور۔17مارچ (اے پی پی):پاکستان کرکٹ بورڈ نے اعلان کیا ہے کہ ایچ بی ایل پاکستان سپر لیگ کے11ویں، 12ویں اور 13ویں مقابلوں کیلئے پیپسی کو سرکاری مشروب اور تفریحی شراکت دار مقرر کر دیا گیا ہے۔اس شمولیت سے شائقین کو میدانوں میں مزید بہتر اور دلکش تفریحی سہولیات فراہم کی جائیں گی۔یہ تین سالہ معاہدہ قذافی اسٹیڈیم لاہور میں ایک تقریب کے دوران طے پایا،جس میں پی ایس ایل کے سربراہ سلمان نصیر اور پیپسی کی اعلی منتظم حکیمہ مرزا نے شرکت کی۔لیگ کی بڑھتی ہوئی تجارتی اہمیت کے پیش نظر مشروب اور تفریحی حقوق کو پہلی بار روایتی میدان کے اندر تشہیری معاہدوں سے الگ کر کے علیحدہ طور پر فروخت کیا گیا، جس میں پیپسی کامیاب ٹھہری۔تفریحی شراکت دار کے طور پر پیپسی پی ایس ایل کے 11ویں مقابلے کے سرکاری نغمے کی تیاری میں بھی تعاون کرے گی۔

واضح رہے کہ پی ایس ایل کا 11واں مقابلہ 26 مارچ سے3 مئی تک لاہور،کراچی، فیصل آباد، راولپنڈی، ملتان اور پشاور میں ہوگا۔اس موقع پر سلمان نصیر نے کہا کہ پیپسی اور پاکستان میں کرکٹ کا تعلق طویل عرصے سے قائم ہے اور یہ شراکت داری نہ صرف شائقین کے لیے بہترین مشروب فراہم کرے گی بلکہ تفریح کے میدان میں بھی نئی جہتیں متعارف کرائے گی۔انہوں نے کہا کہ پاکستان کرکٹ بورڈ پیپسی کے اعتماد کا مشکور ہے اور یہ معاہدہ دونوں اداروں اور شائقین کے لیے فائدہ مند ثابت ہوگا۔حکیمہ مرزا نے کہا کہ پی ایس ایل کے ساتھ شراکت داری ان کے لیے باعث فخر ہے اور پاکستان میں کرکٹ کے ساتھ ان کا دیرینہ تعلق انہیں اس اہم ذمہ داری کے لیے موزوں بناتا ہے۔انہوں نے امید ظاہر کی کہ آئندہ تین برسوں میں یہ اشتراک لیگ کی ترقی میں اہم کردار ادا کرے گا اور شائقین کو بھرپور فائدہ پہنچے گا۔